Education

E fundeshi pa yega na e meta di Sociaal Crisis Plan pa mehora e sistema nacional di proteccion di mucha ta e Codigo di Proteccion cu lo wordo ancra den Ley y lo wordo implementa den sectornan; Enseñansa, Husticia, Social y Salubridad publico. Preparacionnan den cuadro di e trayecto di implementacion di e Codigo di Proteccion den Ensenñansa ta tumando luga desde luna di september 2020.

Departamento di Enseñansa (DEA) conhuntamente cu Departamento di Inspeccion di Enseñansa (DIE) tin como meta pa logra yega na tur e “stakeholdersnan” importante den sector di Enseñansa pa asina implementa e Codigo di Proteccion debidamente. Cu e Codigo di Proteccion den sector di Enseñansa, cada un maestro y maestra lo yuda aporta na señala y maneha cu casonan di sospecho di abuso di mucha debidamente. Na momento cu tin un caso di sospecho di abuso di mucho na scol, lo bay atende cu esaki a base di e 5 pasonan rekeri, cu ta describi den e Ley di Codigo di Proteccion.

“E balor di mas grandi cu e Codigo di Proteccion ta trece den enseñansa ta cu e mucha y hoben lo haya su bos pa expresa y alabes wordo scucha door nos profesionalnan” - Julie-Ann Thode, Lider di Proyecto sector Enseñansa.

E tarea principal pa e sector di enseñansa lo bira, un ahustacion di cada maneho existente riba e tematica aki den tur e scolnan. E ahustacion aki lo ta mas bien dirigi pa incorpora e 5 pasonan uniforme, cu ta describi den e ley di Codigo di Proteccion di Aruba. Den e proximo lunanan lo tuma luga diferente analysis p’asina por delinea henter e proceso mas miho. Finalmente ta gradici tur partner y directiva di e scolnan na Aruba, pa brinda e sosten y colaboracion pa hunto e scolnan tambe yega na un implementacion exitoso di e Codigo di Proteccion, cu lo bay tin un gran balor di proteccion y siguridad pa tur nos mucha-, hoben- y profesionalnan den henter sector di enseñansa na Aruba.

Pa mas informacion tocante e Ley di Codigo di Proteccion por tuma contacto cu Lider Nacional di Proyecto sra. Sue-Ann Ras via email sueann.ras@gobierno.aw.

ENSEÑANSA

Pa ehecuta Codigo di Proteccion den enseñansa, con por sigura y garantisa esaki?

Mediante un setting di un departamento nobo (Departamento pa Mucha y Hoben, DMH), e ley di Codigo di Proteccion ta salvaguardia y monitoria. Tambe lo bay sugeri pa pone esaki den e documento di Codigo di comportacion nacional pa e maestronan y personal completo den enseñansa. Na momento cu e personal no ehecuta e Codigo den un caso di posibel sospecho di abuso, lo por tin un sancion, pasobra e personal no ta cumpliendo cu su deber di trabou.

Con por cumpli y salvaguardia e Codigo den enseñansa?

Lo tin un plan di implementacion di Codigo pa cada directiva y/of stakeholders, unda ta brinda oportunidad pa duna sosten na sea crea of adapta e maneho actual. Tambe lo evalua y midi loke tin caba, kico ta funciona y kico no y ahusta esaki mas cu ta posibel y realisabel den practica. Y manera menciona caba, e Departamento pa Mucha y Hoben lo keda cu e funcion di monitoria Codigo, si e sectornan y e profesionalnan lo cumpli y ehecuta e Codigo den bienestar di e mucha y nan como profesional.

Den caso di sospecho di abuso di mucha, unda e maestro a notifica y a aplica codigo di proteccion, ken y con e maestronan por ta protegi? Y ki proteccion nan lo haya?

E ley di Codigo ta brinda siguridad pa e mucha y hoben den su situacion di famia, trahando hunto na un solucion. E maestro su acercamento lo bay ta uno basa riba respet mutuo y sin huzga, uzando e metodo di Signs of Safety (SofS). E ley ta protega e maestro tambe, mirando cu e tin un deber pa aplica e Codigo, unda cu e lo ta den contacto directo cu sea e Supervisor di Codigo y/of Bureau Sostenemi, cu lo percura pa brinda e maestro tur sosten den e caso specifico.